Urdu Manzil


Forum
Directory
Overseas Pakistani
 

بشیر احمد مسعود

فیصل آباد

دام ِ تحصیل ومراعات میں آنے والا

میں نہ تھا شہ کی مدارات میں آنے والا

محو پرواز پرندے یہ خبر دیتے ہیں

اک نیا رنگ ہے پرواز میں آنے والا

مجھ پہ ٹوٹی ہیں مصائب کی سلاخیں ورنہ

میں بھلا کب تھا کسی بات میں آنے والا

ہم بھی چاہیں ہیں کہاں شہرکو ہجرت کرنا

وہ بھی لگتا نہیں دیہات میں آنے والا

یہ تو میں تھا کہ دل وجاں میں اتارا میں نے

عکس کب تھا وہ میری ذات میں آنے والا

اب تو چپکے سے گذرجاتا ہے پہلو دے کر

وہ میری شام خرافات میں آنے والا

پھرتری یاد کی پروائی لگی ہے چلنے

پھر مرا درد ہے بہتات میں آنے والا

سلسلہ خواب کا ٹوٹا بھی کہاں پر مسعود

آسماں جب تھا میرے ہاتھ میں آنے والا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سوئے مقتل رواں ہوتے ہوئے بھی

میں خوش تھا رائگاں ہوتے ہوئے بھی

دلوں میں فاصلے ہی فاصلے تھے

محبت درمیاں ہوتے ہوئے بھی

نجانے ڈھونڈتی ہیں کس کو آنکھیں

ہجوم گل رخاں ہوتے ہوئے بھی

کبھی لگتا ہے دل کے پاس ہے وہ

بظاہر دوریاں ہوتے ہوئے بھی

کھلا کب گل کوئی دل کے چمن میں

بہاروں کا سماں ہوتے ہوئے بھی

یہ کیسے لوگ دوزخ میں پڑے ہیں

جبینوں پر نشاں ہوتے ہوئے بھی

وہ مردہ ہیں ستم سہہ کے جو چپ ہیں

بقید جسم و جاں ہوتے ہوئے بھی

مہرباں ماں مری زندہ تھی جب تک

میں بچہ تھا جواں ہوتے ہوئے بھی

نجانے کیوں کلیسا پر نظر ہے

حرم کا پاسباں ہوتے ہوئے بھی

پلٹ آئے گا وہ مسعود اک دن

حرم کا پاسباں ہوتے ہوئے بھی

 

Blue bar

CLICK HERE TO GO BACK TO HOME PAGE