Urdu Manzil


Forum
Directory
Overseas Pakistani
 

پروفیسر اویس جعفری (سیاٹل ، امریکہ)

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

"الیکٹرونک میل"

زیرِ لوح کمپیوٹر دیپ جھلملاتے ہیں

حرف و لفظ کے موتی روشنی لٹاتے ہیں

ذہن کے شوالے میں گھنٹیاں سی بجتی ہیں ۔

وادئ تخّیل میں تتلیاں اتر تی ہیں

جیسے نیلے پانی میں چاند دیکھے آئینہ

جیسے جھیل میں اترے قافلہ ستاروں کا

فصلِ گل میں جس طرح خود بخود کھلیں کلیاں

جیسے جھومتا گزرے کارواں بہاروں کا

جیسے پاس سے گزرے ایک خوشبو اک  آٓنچل

جیسے رخ پہ لہرائے زلف کا کوئی بادل

مسکراتی آٓنکھوں میں جیسے پھیلتا کاجل

دل پہ تیر لگنے پر جیسے خوش ہو اک گھائل

چا ندنی چھٹکتی ہو جس طرح منڈیروں پر

برف پوش پر بت پر جیسے رقص کرنوں کا

جیسے گل قبا کوئی شعر گنگناتا ہو

جیسے کوک کوئل کی جیسے شور جھرنوں کا

جس طرح کوئی الہڑ کھلکھلاکے ہنستی ہو

دھوپ میں نہاتا ہو جیسے کھیت سرسوں کا

جیسے بانہیں گردن میں ڈال دے کوئی ٓٓٓٓ آ کر

جیسے کوئی مل جائے بچھڑا دوست برسوں کا

گائوں میں خیالوں کے جیسے ایک میلا سا

یا کلیلیں کرتا ہو بن میں غول ہرنوں کا

نظم ہو رہے ہیں یوں آج شعر کے پیکر

گوندھنے لگے مالن جیسے ہار سپنوں کا

تجھ  سے ہم نے کمپیوٹر جب س آشنائی کی

اب قلم کی حاجت ہے اور نہ روشنائی کی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سید صغیر احمد جعفری اور صبیحہ صبا کی نذر ، جو اردو زبان و ادب کے فروغ کے لئے عالمی سطح پر گرانقدرخدمات انجام دے رہے ہیں ۔ میں انہیں "اردو منزل" کی سالگرہ پر ہدیہ تہنیت پیش کرتا ہوں ۔

(محمد اویس جعفری)

 

Blue bar

CLICK HERE O GO BACK TO HOME PAGE