تحریم حیدر

 کہتا نہ اپنی بات کبھی بار بار میں

دل کے معاملے میں تھا بے اختیار میں

صد شکر موت کی کبھی پروا مجھے نہ تھی

ہر آن زندگی سے رہا ہوشیار میں

آدیکھ بے وفا میری تنہائی کا سفر

زندوں میں ہو رہا ہوں ابھی تک شمار میں

کیا جانےمیرا چاند کہاں جا کے چھپ گیا

کرتا ہوں ساری رات ستارے شمار میں

ہر بار بے رخی تھی تغافل تھا جب گیا

محفل میں ان کی جاؤں گا اب بار بار میں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہر پل نئی سزا ہے کہیں لے چلو مجھے

دم گھٹ کے رہ گیا ہے کہیں لے چلو مجھے

یہ گھر نہیں، مکان ہےآسیب ہیں یہاں

کمروں میں خوف سا ہے کہیں لے چلو مجھے

سوکھی ہوئی سی بیل ہے اجڑے سے بام و در

ہر پیڑ بھوت سا ہے کہیں لے چلو مجھے

تنہائی جھانکتی ہےکواڑوں کی اوٹ سے

پر ہول سی فضا ہے کہیں لے چلو مجھے

تنہائی گونج اٹھی مرے قدموں کی چاپ سے

سناٹا بولتا ہے کہیں لے چلو مجھے

و تھے قصور وار یا تقصیر تھی مری

منصف تو بس خدا ہےکہیں لے چلو مجھے

یوں تو حریم سب ہی انوکھے تھے حادثات

یہ سانحہ نیا ہے کہیں لے چلو مجھے