مسعود حسین خان

تیرے کھونے کا کس قدر غم ہے

آج  عالم تمام   مبہم   ہے

دیکھتا ہوں نظر نہیں آتا

کیسا نیرنگِ چشمِ پر نم ہے

درد ٹھہرا ہوا سا ہے دل میں

سوزش غم بھی آج کم کم ہے

کتنی ویرانیاں ہیں آنکھوں میں

کتنا پیروں میں رقصِ پیہم ہے

دیدہ و دل بچھے سے جاتے ہیں

کیسی غم ناک شامِ ماتم ہے

تم نے مسعود کو بھی دیکھا ہے

وہ تو افسردگی مجسم ہے

۔۔۔۔۔۔

عشق میں اضطراب رہتا ہے

جی نہایت  خراب  رہتا ہے

خواب سا کچھ خیال ہے لیکن

جان پر اک عذاب رہتا ہے

تشنگی جی کی بڑھتی جاتی ہے

سامنے اک سراب رہتا ہے

مرحمت کا تری شمار نہیں

درد بھی بے حساب رہتا ہے

تیری باتوں پہ کون لائے دلیل

دل ہے سو لاجواب رہتا ہے