نیلم احمد بشیر

خود کش بمبار لڑکے سے

سرخ سیبوں جیسے گالوں والے خوبصورت لڑکے

تمہارا نام کیا ہے؟

کیا کہا عبدالقیوم؟

ارے میرے منّے کا بھی تو یہی نام ہے

وہی جو صبح اسی رستے سےاسکول گیا ہے

جس پہ تم جیکٹ پہنے جا رہے ہو

تمہیں کہیں ملا تو نہیں

شکر ہے اس وقت تک تو وہ اسکول پہنچ گیا ہوگا

اس کے ابو اسی سڑک کی

ایک پولس چوکی پر پہرہ دے رہے ہیں

عبدالقیوم ان سے روز گلے مل کے جاتا ہے

تم نے انھیں دیکھا تو نہیں

خدارا انھیں اپنا نام نا بتا دینا

کہیں وہ تمہیں بھی گلے سے نہ لگا لیں

KHUDKUSH BAMBAAR LARKAY SAY