واجد امیر

جہاں ہے دشمنی کی حد وہاں تک آگئے آخر

تمہارے تیر ترکش سے کماں تک آگئےآخر

کسی اندوہ پر اب تو کلیجے شق نہیں ہوتے

ردائے بےحسی اوڑھے کہاں تک آگئے آخر

وہی ہو کر رہا آخر کہ جس کا دل کو دھڑکا تھا

جہاں سے ابتدا کی تھی وہاں تک آگئے آخر

کسی سفاک  لمحے نے خموشی تور ہی ڈالی

جنہیں تھا زعمِ ضبط ِ غم فغاں تک آگئے آخر

بہت چاہاکہ دل میں دفن کر دیں رنجشیں واجد

جو چھالے دل میں پھوٹے تھے زباں تک آگئے آخر

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

 تسلی حرف کی بازی گری ہے

جو دل کا حال پہلے تھا وہی ہے

اگرجہ سارے جگنو مر چکے ہیں

مگر پتوں پہ کیسی روشنی ہے

ہمیں ارزاں سمجھ بیٹھی ہے تو بھی

تری چاہت بڑی مہنگی پڑی ہے

شب تنہائی کے فرمارواؤ

خموشی بات کرنا چاہتی ہے

کہاں ہیں وہ ابابیلوں کے لشکر

عدو کی فوج سر پر آچکی ہے

ہر اک تصویر رنگوں سے ہے خالی

مگر دیوار پر تتلی سجی ہے

کھچی جاتی ہیں آنکھون پر لکیریں

کوئی شے دل کے اندر توٹتی ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ابھی رکے نہیں صد مے تھمے نہیں آنسو

کہیں پہ خون پڑا اور کہیں گرے آنسو

یونہی نہیں یہاں چشمے ابلنے لگتے ہیں
کئی زمانوں سے پیتی رہی زمیں آنسو

گرے تو تیرا ہی دامن بھگو کے رکھ دیں گے
اگر نہ روک سکی تیری آستیں آ نسو

خوشی و غم کا عجب امتزاج ہے یہ حیات
جہاں پہ قہقہے گونجے،بہے وہیں آنسو

تمام گھر تو ہوا آنسوؤں سے پر واجد
کہاں سنبھال کے رکھیں گے اب مکیں آنسو