صغیر احمد جعفری 

حمد و نعت  ۔
 
خدائے  پاک  ہے  جو  پالنے  والا جہانوں کا
وہی  مالک  وہی  آقا  زمین و آسمانوں  کا
  
وہی  تو  ہے ہماری  زندگی  آسان  جو  کردے
وہی داتا وہی مالک جہاں کے کل خزانوں کا
 
وہی تو ہے جو قسمت کے اندھیرے دور کرتا ہے
وہی  ہے  باغ  کا  مالک  وہی  ہے  باغبانوں   کا
                      ۔۔۔۔۔۔۔۔۔۔۔۔
دکھادے پھر سے اپنا گھر دکھادے
مرا سر صحن ِ کعبہ میں جھکادے 
حرم میں مرے سجدے ان گنت ہوں
جبیں کو روشنی سے جگمگادے 
در ِ اقدس پہ ایسی حاضری ہو
دیار ِ  دل  کو  اک   کعبہ   بنادے 
ترا  کعبہ  مری   چاہت   کا    مرکز 
مری آنکھوں میں یہ کعبہ بسادے 
ترا   ہی    نام    لے    کر    نیند    آئے
مجھے اس خواب ِ غفلت سے جگادے
یہ سارے بت جو ہیں حرص و ہوس کے
مرے   مولا   یہ   سارے   بت   گرا  دے
ترے  در  سے  تری  رحمت  سمیٹون
فقط   اپنا    مجھے    تو    آسرا    دے
کوئی  بخشش  کا  ہو  جا ئے  اشارہ
گناہوں    کو    مرے    مولا   مٹا   دے 
                 ۔۔۔۔۔۔۔۔۔۔۔۔۔۔۔

قلب و جاں کرے روشن روشنی کا حامل ہے 
ذکر ِ  دل  نشیں  ان  کا زندگی کا حاصل ہے
جو  بڑی  محبت  سے  یاد  ِ مصطفے ٰ کرلے 
وہ  بڑا  تونگر  ہے  جو کہ ان کا سائل  ہے 
 

۔۔۔۔۔۔۔۔۔۔۔۔۔۔۔۔۔۔۔۔۔
پہلے تو حمد کرتا ہوں رب ِ  قدیر کی 
پھر بات میں کرونگا بشیر و نذیر کی
 
میں خوش نصیب ہوں کہ دعا لب پہ آگئی
یہ  بھی  تو  اک  پکار ہے مرے ضمیر کی
 
نرمی میں بے مثال وہی آقا ئے نامدار
آ ئی لبوں پہ نعت اسی بے نظیر کی
 
کیسا عجب سکون در ِ مصطفے ٰ پہ ہے
یہ  بات  یاد  رکھنا  نبی  کے  فقیر کی
 
جالی  کو  تھام تھام کے بے حال ہو گیا
حالت سنبھل گئی تھی مگر پھر صغیر کی
 
صغیر احمد جعفری