شفیق سلیمی

تپش سے انتخاب

جب برے لوگوں سے اچھا بھی ہوا کرتا تھا

اک ترے شہر میں مجھ سا بھی ہوا کرتا تھا

صحن مسجد سے ادھر چند برس پہلے تک

ایک درویش کا ڈیرا بھی ہوا کرتا تھا

اک زمانے میں شرافت کو مہا مانتے تھے

سنتے آئے ہیں کہ ایسا بھی ہوا کرتا تھا

سرخ آندھی کے تھپیڑوں سے دہل جاتے تھے

قتل ہوتا تھا تو چرچا بھی ہوا کرتا تھا

 سر کٹا دیتے زبانوں سے نہ پھرنے والے

عہد جو ہوتا وہ پورا بھی ہوا کرتا تھا

گاؤ ں سے آتے تھے سندیس بھی سوغاتیں بھی

گاہے گاہے وہاں جانا بھی ہوا کرتا تھا

اب تو بس ریگ رواں موج میں رہتی ہے شفیق

پہلے اس دشت میں دریا بھی ہوا کرتا تھا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سبھی سود و زیاں سے ماورا ہے

جہاں ہم ہیں وہاں سب کچھ روا ہے

نجوم وماہ سے خالی ہیں افلاک

ہوا ہے رات ہے اور اک دیا ہے

یہ کیسی بے بسی کی زندگی ہے

مرا ہمراز بھی مجھ سے خفا ہے

کہیں کوئی نظر آتا نہیں ہے

نگر آسیب سے یوں بھر گیا ہے

شفیق اس دل کو تم قابو میں رکھنا

یہ  آوارہ  کہاں  زنجیر پا  ہے