شاہ زمان کوثر

موسمِ گل سے عداوت بھی تو کر سکتے ہیں

ہم ترے شہر سے ہجرت بھی تو کر سکتے ہیں

کیا ضروری ہے خیالات کی بیعت کرنا

ہم خیالوں سے بغاوت بھی تو کر سکتے ہیں

آئنے جھوٹ نہیں بولتے صاحب لیکن صاحب

آپ جیسوں سے مروت بھی تو کر سکتے ہیں

ہم وہ درویش صفت لوگ ہیں جن سے مل کر

لوگ بے وجہ محبت بھی تو کر سکتے ہیں

لاکھ وہ اپنی حقیقت کو چھپائے کوثر

ہم بصارت کو بصیرت بھی تو کر سکتے ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

میرے چہرے پہ عیاری نہیں ہے

حقیقت ہے  اداکاری نہیں ہے

تجھے معلوم ہے تنقید تیری

مرے الفاظ پر بھاری نہیں ہے

توکل اس قدر ہے زندگی پر

یہان مرنے کی تیاری نہیں ہے

حمایت کر رہے ہو تم انا کی

مگر دل کی طرف داری نہیں ہے

خوشی کا جشن تو ہوتا ہے برپا

یہاں غم کی عزاداری نہیں ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

بچھا پاؤں میں کیسا راستہ ہے

سفر ہی مرحلہ در مرحلہ ہے

دکھاوا ہے مرے چہرے کی رونق

ہنسی میں بھی چھپا اک سانحہ ہے

میں اک مدت سے جس کامنتظر ہوں

وہ لمحہ راستے میں سو گیا ہے

لٹی بستی میں لاشے خواہشوں کے

مرے اندر بپا اک کربلا ہے

عجب ہے بھیگتی آنکھوں کا منظر

عجب خاموش لہجے کی صدا ہے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

شام کے سائے ، سمندر کی ہوا ،تیرا خیال

پانیوں پر لکھ رہا ہوں جابجا اپنا خیال

منتظر رہتے ہیں چہرے،رات کی دہلیز پر

بولتی سی اک خموشی اک سسکتا سا خیال

فائدے اس کے تیری ہی ذات سے منسوب تھے

کون رکھتا ہے کسی کا اور پھر اتنا خیال

صبح دم پلکوں پہ لرزاں تھا نگینے کی طرح

ہجر کے احساس میں بھیگا ہوا تنہا خیال

کھو گئی پہچان اپنی مصلحت کی دھند میں

تو ہے دھندلا سا تصور میں ادھورا ساخیال