عطااللہ جنوں کی ایک غزل
قادرِ مطلق ہے تو ، بے اختیاروں سے نہ کھیل 

اے امیدِ حسرت افزا ، اے سرابِ دشتِ یاس
جا مرے آنسو نہ پونچھ ، ان آب شاروں سے نہ کھیل

کچھ نشیمن اس سے آگے بھی ہیں اے برقِ نگاہ
آسمانوں تک نہ رہ جا ، چاند تاروں سے نہ کھیل

یہ مصافِ عشق ہے ، او بوالہوس! میداں نہ مانگ
نے سوارِ خیرہ سر ، جا شہ سواروں سے نہ کھیل

گلشنِ صد سالہ میں اک مرغِ نو پرواز تو *
او خزاں نا آشنا! میری بہاروں سے نہ کھیل

برق طلعت نازنینوں کی نہ زلفوں میں الجھ
او دلِ مرگ آرزو! بجلی کے تاروں سے نہ کھیل

دیکھ او مرغِ چمن! اہلِ قفس کے منھ نہ آ
شاد کامِ بزمِ عشرت! سوگ واروں سے نہ کھیل

یہ مغیلاں زار ہے ، اے نازنینِ قومِ حے
تو خرابِ ذوقِ گل بازی ہے ، خاروں سے نہ کھیل

مجمعِ اہلِ خرد ہے ، اے جنونِ ہرزہ جوش!
لا ابالی شیوہ ہے تو پختہ کاروں سے نہ کھیل