کامران غنی صباؔ
جامعہ ملیہ اسلامیہ، نئی دہلی
طبیعت مضطرب، بے چین دل، یہ کیا ہوا مجھ کو
ترے طرزِ تغافل نے پریشاں کر دیا مجھ کو

شبِ فرقت میں کیا گزری، دلِ درد آشنا تجھ پر
میں ان سے پوچھنے کو تھا، دکھایا آئینہ مجھ کو

نہیں مرہونِ منّت جرأتِ اظہار لفظوں کا
تری نظروں نے پیغامِ محبت دے دیا مجھ کو

بڑھا دے اضطرابِ دل کہ کچھ آرام مل جائے
سکونِ دل میسر ہو خدا نخواستہ مجھ کو

مرے جذبِ محبت کا خدارا امتحاں مت لے
قسم تیری جفاؤں کی، نہیں تابِ جفا مجھ کو

غمِ الفت، شبِ فرقت، نگاہِ یاس اور حسرت
صباؔ تیری رفاقت میں بجز غم کیا ملا مجھ کو