شاہدہ حسن

زمیں نے صبر کیا ، آسماں نے صبر کیا

مسافرانِ رہِ بے اماں نے صبر کیا

جوازِ بے سخنی کچھ نہیں فقط یہ ہے

جوحرف ہو گئے ارزاں ، زباں نے صبر کیا

عجب ہے کشمکشِ آرزو کا حاصل بھی

گھروں سے دور ہیں بیٹے تو ماں نے صبر کیا

کٹھن گھڑی میں بھی کوئی نہ آس پاس ملا

صدائیں دے کے دلِ خوش گماں نے صبر کیا

ہوائے درد نے آنکھوں سے خواب چھینے جب

لہو نے صبر کیا ، جسم و جاں نے صبر کیا

نہ جانے کون سی بنیاد میں بھری تھی یہ آگ

دھوں اٹھا ہے تو جلتے مکاں نے صبر کیا

جو رہنما ہیں انہیں راس آئی در بدری

یہ سن لیا تو مرے کاروان نے صبر کیا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ہدایت رہی ، گمرہی سے الگ

اندھیرے ہوئے روشنی سے الگ

کیے اور بھی کام میرے لیے

فلک نے ستارہ گری سے الگ

کسی گھاؤ کو چھیڑنے کا ہنر

ہے زخموں کی بخیہ گری سے الگ

ٹہرتی نہیں میری مٹی کہیں

یہ گردش ہے ، کوزہ گری سے الگ

رہا عمر بھر جو مری زندگی

رہی عمر بھر میں اسی سے الگ

یہ کیا کم ہے رکھتے ہیں اپنا جواز

مرے اشک تیری ہنسی سے الگ

اٹھا یا تھا مل کر ابھی تو قدم

ہوئے جا رہے ہو ابھی سے الگ

تعلق میں پیہم تسلسل رکھو

ہے کارِ وفا عاشقی سے الگ

مرے کیمرے میں سمایا نہیں

تھا اک حسن منظر کشی سے الگ